1. Il so rapuart di predi cu la gjerarchie.
Si sa che al è stât un rapuart conflituâl, in tension, pes posizions critichis ma ancje claris che al cjapave tai confronts de struture o de barache, come che di solit le clamave. E cun ducj i fastidis che si tirave intôr nol à mai desistît. Par chest di pò paragonâlu ai grancj profetis de storie bibliche e de glesie che no àn mai vude vite facile cul podê.
Lis posizions claris e fuartis che al cjapave a sburtavin daspès predis in cariere o ancje che a smicjavin a la cariere a dî: “Ce spietial a saltâ fûr de glesie”. Ma sintìn ce che al pense lui in merit: “Ce dirit-dovê aio di impaçâmi tes cuistions de diocesi? Ce competence e ce cognossince aio di chescj problemis? Soio sigûr di volê il ben de mê glesie o no vadio cirint une mê figure di protagonist a ogni cost? Jo o pretint che la glesie e sedi perfete, ma jo soio perfet? No disial il Vanzeli che chel che al è cence pecjât al è l’unic in grât di tirâ il prin clap? Il ben de glesie si aial di mostrâlu criticant o tasint? Un fi mostrial l’afiet par sô mari cul lâ a spampanâ lis sôs pecjis par che si mendi o preant e patint e vaint di scuindon par che il Signôr i tocji il cûr? … Se propit propit no mi va nuie, parcè restio dentri, mangjant il pan de istituzion, invezit di vê la coerence di lâ fûr? Cui aial zovât plui a la glesie: I ribei e i riformadôrs o i sants che a àn patide l’injustizie tasint e perdonant? Dutis domandis che mi soi fat sepi Diu tropis voltis, inte mê cariere martoriade di predi. ... E insieme la pore di jessi fûr de gracie di Diu… Ce tantis voltis che o ai sintût dentri di me la voe di fermâmi, di tasê… Ma ogni volte, cul cûr insanganât, o soi lât indenant. Parcè che une vôs mi sburtave a fevelâ, a intervignî, a sclarî. Come une condane a fâ une vore plui grande di me, par int plui buine di me…” (Scrits inedits 1992). Al pâr di sintî il profete Gjeremie. Al salte fûr dut il so amôr, la sô passion par une glesie plui gjenuine, plui evangjeliche, che i zovi no a se stesse ma a la int…
2. Predi cuintri dal clericalisim
La passion pe glesie, però, lu puartave a contestâ il clericalisim. Fevelant di tante gjerarchie clericâl al dîs che cul passâ dai secui “… Invezit di servî i plui piçui e debui, si à scomençât a servîsi di lôr e a tignîju sot, contant ancje cualchi sflocjute a messet de veretât e spirtantju cu la pore dal boborosso. Al pape bisugnave bussâi il pît, ai vescui l’anel stant in genoglon, ai predis la man stant cul cjâf bas. No jerin plui ministris: a jerin deventâts parons; in cheste maniere, un pôc a la volte, al è nassût il clericalisim, vadì il podê dal predessam e, par reazion, l’anticlericalisim, vadì la fote cuintri la tribù dai corvacs”. – Al continue: “I predis di serie A a son chei che a fasaran ferade, che a laran a finîl te trasêf. Jo ju clami «poleçs di alevament», che, se si ju mangje, no san di nuie. A son bogns dome di dî “sissignor!” e di tignî salts i privilegjos dal gleseam. No son i plui inteligjents, anzit plui di un si viôt che no i rive la tele, però a son sigûrs par chel che al comande. Cussì i vescui ju metin tai puescj plui impuartants o adiriture tal gjalinâr de curie. Si ju viôt subit in muse: ben mitûts, corets, cul cjâf in bande, cul breviari o la corone in man, simpri a puest, bausaruts, ma dome pal ben de glesie, lechins, oratôrs di “aiar”. (Siôr santul 1976, p. 55.57).
Plui di cualchidun al considerave pre Antoni un dissacratôr. In veretât nol à mai dissacrât nuie, al à vût simpri grant rispiet ancje de religjositât popolâr che tai secui e à tignût sù e judât la int intes traviersiis e tragjediis de vite. Par fâus un esempli banâl: La sô tonie no le doprave mai, anzit i plaseve meti biei vistîts e golarinis, però no le à mai prestade a dinissun par che a lessin in mascare come che tancj devotissim a fasevin, parcè che par lui ancje la tonie e veve un so valôr simbolic. “Che resti picjade tal armaron”, al diseve.
Come che al inmagjinave e al sumiave la glesie, plui che dissacrâle, al à cirût di declericalizâle, scombatint la prepotence clericâl. Dopo un fat di cronache sucedût, doprant il gjenar leterari de letare, al scrîf “A un plevan prepotent”. Al dîs “…Salacôr tu sês prepotent parcè che tu ti sintis intal ordin, te ortodossie, te schirie ridote dai juscj. Jo, che o soi sul ôr dal ordin, di dubie ortodossie e di scjarse virtût, tolerât come Calimero, no pues permetimi di jessi prepotent, parcè che mi vignarès di ridi par prin a mi. Acete alore dôs peraulis a non e a pro de “massa damnatorum” che e je simpri stade maiorance, in teste des premuris comprensivis dal Signôr, unic Pastôr e Redentôr e cence deleghis.
No sta inluditi di jessi tu il pastôr des pioris, dal moment che ancje tu tu sês piore o roc. No sta croditi paron de gracie, che ancje tu tu âs dibisugne de gracie e dal perdon. Come e plui di ducj.
No sta jessi masse sigûr dai progjets di Diu, parcè che lui al reste mistereôs e incomprensibil ancje pal plevan e pal pape. Se tu sês masse sigûr di Diu o tu sâs masse di lui, spaventiti, parcè che tu riscjis di vê par mans un idul, deventant cussì il prin idolatre dal paîs.
No sta mai jessi sigûr che la int no si salvi e tu sì, parcè che Diu al è grant soredut intes sorpresis.
No sta croditi just dome parcè che tu cognossis ducj i pronunciaments de glesie e i dogmis e tu rispietis la leç. La peraule di Diu e cognòs ancje altris cjanâi e cussì la sô misericordie.
Se la fede e je un don di Diu e no sogjete a nissun control, preferìs pensâ che la int le vedi, dal moment che nancje tu no tu sês sigûr di vêle.
No sta sintîti fuart parcè che tu rivis a meti in rie i piçui e i debui. Chei a son simpri stâts in rie. Intai miei agns di mestri, o ai dât tre scufiots, che mi pareve just. O speri che i fruts ju vedin dismenteâts, ma jo no rivi, parcè che nol è onôr dâlis a di un che nol pò tornâlis. Al è plui onôr tignî dûr e cuntindi cul vescul e cui grancj che no cu la int. No sta metiti cuintri dai piçui e dai puars, tu che tu sês vignût fûr di int piçule, là che Diu al va a sielzi lis sôs rosis.
No sta vê pice di difindi Diu, che nol à dibisugne di te. Difint la tô int denant dal Signôr e tu cjatarâs tancj avocats par te.
Cuant che tu alcis la man par minaçâ o par dineâ l’assoluzion, ten a ments che and è une man plui grande de tô e che nus ten sot ducj.
No sta ruvinâ i moments fuarts de fede, come un batisim, une prime comunion o un matrimoni, ch’a son paraltri ancje moments di fieste, cun rimpins e cavîi che no valin un damp che ju segnarà par dute la vite. I sacraments a son stâts metûts pai oms e no cuintri. L’unic che al podarès jessi trist o sevêr al sarès Crist. Ma lui si sentave in taule cui pecjadôrs e impen di condanânus ducj al à distirât i braçs sul len de crôs, robe che tu no tu âs fat” (Olmis n. 2 1997, p. 99). Pagjine di alte spiritualitât.
3. Compit dal predi
Cemût viodial il predi alore pre Antoni. Il predi al à prime di dut il dovê di cognossi la sô int. Il cognossi no in sens statistic o sociologic, fat di numars cence anime, ma tal sens biblic, di un amôr profont, di une cognossince intime, di un filing che si cree tra predi e comunitât. “Il predi al ven a vivi cun vualtris, a fâ un toc di strade insieme. A judâus cuant che o sês jù di cuarde; a indreçâus cuant che o sgarais; a memoreâus lis robis eternis cuant che o sês distrats; a fâus cualchi corezion cuant che o lais fûr di troi; a insegnâus il viaç dal cîl. Il predi al è dongje di vualtris par contâus la buine gnove…” (Sul at di voltâ pagjine 1982, p. 47.48). Un dai siei plui grancj obietîfs al è stât chel di judâ la int, i puars a scuviergi ancje lis propriis virtûts e aspiets positîfs, che ant varan ben cualchidun. Masse inteletuâi e àn dome svilanât i furlans par lôr difiets, che ducj si jusa e si ju cognòs, cence judâju a scuviergi ancje il ben. Disint a un frut che al è roc al cres cu la idee di jessi pardabon roc.
La prime regule pastorâl par pre Antoni e je l’umanitât. Agns indaûr 1997 lu vevi puartât su a Rualp e Val e Treli a incuintrâ i siei prins amôrs, dopo tornât jù al scrîf: “Intun lamp o soi tornât in sintonie cun chel timp fondamentâl de mê vite di predi là che, usance Gjesù a Nicodem, o soi tornât a nassi, bandonant struture, erudizion, programis preconfezionâts, ogni sience e fuarce clericâl, par fâmi ultin cui ultims e spartî lis lôr ricjecis e i lôr limits, che no jerin “secundum ordinem Melchisedec”. Par capî e jessi capît, par cressi e par judâ a cressi. E si pò tacâ cheste aventure dome se si jentre a contat di anime, in plene gratuitât e disponibilitât. Incuintrant i pôcs che o ai cjatât, dopo di vê stât a saludâ i tancj che a àn stralozât tal lûc de polse eterne, o ai capide la leç de relativitât dal timp. Difat a colp si è sbregât il vêl de separazion e al è stât come se o fossin stâts simpri insieme. Parcè che l’anime e tornave a gjoldi e a patî. O ai simpri pensât che l’eternitât e scuen jessi une condane se al mancje l’amôr. Se si stufisi tun’ore, no esal d’ingrisulâsi a pensâ di frontâ i secui dai secui? Ma l’amôr al è vite e contemporaneitât, come che il passât al è muart e sepulture. Se si vuelisi ben, si scancele il passât e si è in eterne presince. Par chel a disin che i amants a son in paradîs. Di tant timp passât insieme, la int no ricuarde plui ni lavôrs ni dutrinis ni teologjiis. Dut chest al ven dismenteât par prin e al è di stupits inviestî in energjiis. La int si vise che o vin preât insieme e soredut che o vin stât ben insieme…. Tal racomandâju ancjemò une volte a Diu, l’unic pastôr e il vêr plevan di un paîs, o torni su la mê idee fisse o carûl: la prime regule pastorâl e je la umanitât. Anzit l’uniche. Intindude tal spieli de incjarnazion dal Signôr. Parafrasant l’Imitazion di Crist, o disarai che, se tu às umanitât, nol è impuartant se no tu às altris cualitâts. Se no tu às umanitât, ancje lis tôs plui bielis cualitâts no valin nuie”. (Olmis n. 2, 1997, p. 9-10).
Alore, la figure gnove dal predi, che par altri par pre Antoni no je nancje gnove, e sarès chê di riproponi ce che al diseve ancjemò san Pauli (1 Tm 3,27): “Il vescul al scuen jessi une vore a puest, sposât cuntune sole femine, misurât, prudent, dignitôs, ospitâl, bon di insegnâ, no cjapât tal vin. No prepotent ma bon di cûr, no barufant, no tacât tai bêçs; al à di savê governâ ben la sô famee e tignî i fîs sotoponûts cun dut il rispiet. Parcè che se un nol è bon di governâ la sô famee, cemût podaraial proviodi a la Glesie di Diu?”. Dit in peraulis nestris, - al continue pre Antoni - al à di jessi un bon om, soredut un om bon, di esperience, madressût. O disarès une persone che inte vite e à fate une biele riessude dal pont di vieste de bontât, de serietât, de onestât, de pietât, che la int si fide a contâi i siei segrets a domandâi un consei. (…et incarnatus est 2005).
4. La dimension ironiche
Si podarès continuâ a dilunc parcè che sul predi e su altris temas pre Antoni al à scrit tantis robis, e ducj i siei scrits a puedin deventâ libris di meditazion e di riflession. Ma no pues ocupâ dute la serade.
Mi plasarès sierâ però ancje cuntun altri aspiet di pre Antoni pôc tocjât: La sô ironie e autoironie. Mi visi a memorie che un capo de curie, intun dai moments plui cjalts di tension, i veve scrit: “Quanto sei caduto in basso don Antonio, non sei capace di sentimenti, non sai sorridere…”. Invezit tra lis tantis robis che o puarti tal cûr e je ancje che cun pre Antoni o vin ancje tant, ma tant ridût.
Sintît cualchi so pinsîr in merit a la ironie e al savê ridi, che al è ce che lu à salvât des batostis morâls cu l’autoritât, di tantis ocasions di depression, amarece, delusion, di tancj moments che lis malatiis lu an tormentât e massacrât. Al scrîf: “Lu san ancje i miedis che no batin lis glesiis e lis canonichis, par frontâ in maniere positive il mâl fisic, nissune midisine plui adate de serenitât interiôr e di un sclip di fede. Tant a dî che, par stâ ben, no baste une pirule o un flebo. E covente ancje une buine ridade e magari une preiere. … Il ridi, su di sé e sul prossim, al fâs ben a dut, tant al cuarp che a l’anime, e al covente come il pan. Un che nol rît mai al è trist o malât. E un che nol vai mai, al fâs vaî chei dongje. … Il ridi, come sfogo salutâr e come segnâl di armonie interiôr, di une persone che e vîf in maniere positive il rapuart cun se stesse, cui oms, cul mont e cun Diu, al è une gracie di domandâle ogni dì a la Madone e ai sants, ancje lôr animis contentis pal fat ch’a jerin inocentis e buinis. Vêso mai viodût un sant rabiôs? Puedial un rabiôs e un salvadi jessi considerât un sant? Cui laressial a impiâ une cjandele e a domandâi la gracie a un sant o une sante cuntune muse di disperât e une cuarnadure di fâ spavent?”. …
Al continue cun cualchi storiute:
“Jo o ai vût mût di cognossi, tai miei agns di predi (Cjargne), tant chei che si ruvinavin e a ruvinavin la famee cul bevi che chei che si ruvinavin e a ruvinavin la famee lant a passon là che no varessin vût di lâ. E no mancjavin i câs ridicui. Come chel che, sintint a rivâ l’om, al jere scjampât pal barcon cuntun pâr di bregons cjapâts sù di corse e a scûr, crodint che a fossin i siei e invezit al è rivât te ostarie cuntun pâr di bregons di garbenîr, cun tant di strissule rosse. Lu àn clamât par dute la vite “il maressial”. O come chel che al leve a passonâ tune cjase crodint che di fâle francje, ma l’om tradît, ch’al saveve dut e al faseve il barbîr, cuant che si è presentât il … cugnât, cence dî né eri né beri, cu la machignete lu à rocât a forme di crôs, come i mus.
Ma il câs plui curiôs lu à contât il gno predecessôr pre Bastian, in glesie, intant ch’al spietave che si des dongje la int pe messe grande. Al jere za parât. Al jere li, tai prins bancs, un trop di femenutis devotis e peteçonis e lui ur domande: “Vêso savût di chel câs di Pordenon, di chê femine che i faseve i cuars al om?”. “Po no che no vin sintût. Ce esal sucedût po, siôr plevan?”. Alore pre Bastian al conte di une femine zovine e murbinose che e tradive l’om e lu faseve dispes, parcè che lui al jere simpri vie cul camion. Une brute dì, l’om al ven fermât dai pulizais parcè che nol à la patente. Al torne di corse a cjase par procurâsi i documents e no ti cjatial la femine in vore cuntun sarcandul? Il bec al scjampe come il fum, ma la femine e reste come paralizade, che no se spietave. L’om, cul gnervôs che lu ardeve e cu l’umiliazion che lu consumave, cence stâ a cincuantâ, al cjape sù une tace, le jemple di diserbant e je fâs bevi a la femine. ”Joi, puare! – a suspirin lis devotis. – Ese muarte?”. “Po no no! – al dîs pre Bastian. – I è dome colât dut il pêl… E cumò tachìn la messe, che o sin in ritart”….
Pre Antoni al conclût la sô riflession: “Cumò si (e) sta passant un moment grivi parcè che la int e cale e, cul sierâsi des glesiis, des scuelis e des cjasis, ancje la int si siere simpri di plui. Bisugne tornâ a ridi, a reagjî, a ripiâ il gust di vivi e di scombati. O vin ridût cui pedôi, cu la miserie, cu lis disgraciis incrosadis, parcè no vino di ridi cumò? Al è un sfogo liberant. E je une midisine psicologjiche straordenarie. … O vuei che la nestre int (la Cjargne) e resti vive e fuarte, ciniche e ironiche, furbe e maliciose. Che e conservi come un patrimoni straordenari e unic la tante sapience, la tante passience, la tante fuarce, la tante santitât ingrumade tai secui. Che e puedi continuâ a sperâ, a lotâ, a cjantâ. A ridi. Par no fâsi ridi”. (Mi ven di ridi, 2006)
Nessun commento:
Posta un commento